مون سون ہواوں کا سلسلہ مسلسل جاری۔ 17 جولائی تک طوفانی بارشوں کا امکان

پنجاب ڈیزاسٹر مینجمنٹ اتھارٹی نے محکمہ موسمیات کی پیشگوئی کے بعد متعلقہ محکموں کو الرٹ جاری کر دیا۔

پنجاب ڈیزاسٹر مینجمنٹ اتھارٹی نے محکمہ موسمیات کی پیشگوئی کے بعد متعلقہ محکموں کو الرٹ جاری کر دیا۔ ترجمان پی ڈی ایم کے مطابق محکمہ موسمیات نے پیشگوئی کی ہے کہ خلیج بنگال سے مون سون ہوائیں ملک کے بالائی اور وسطی علاقوں میں مسلسل داخل ہو رہی ہیں جس کے باعث 13 سے 17 جولائی کے دوران ملک بھر کے مختلف علاقوں میں تیز ہواؤں کے ساتھ ہلکی اور تیز بارش کا امکان ہے۔13 اور 15 جولائی کے دوران لاہور،گوجرانوالہ،سرگودھا،ساہیوال،فیصل آباد،ملتان،بہاولپور اور ڈی جی خان ڈویژن میں وقفے وقفے سے تیز ہواؤں اور گرج چمک کے ساتھ مزید بارش کا امکان ہے۔ترجمان پی ڈی ایم اے کے مطابق13 اور 14 جولائی کو راولپنڈی/اسلام آباد،فیصل آباد،لاہور اور گوجرانوالہ میں نشیبی علاقے زیر آب آنے کا خدشہ ہے جبکہ راولپنڈی/اسلام آباد کے مقامی ندی نالوں میں طغیانی کا شدید خطرہ ہے۔اس دوران کشمیر، گلیات،مری،چلاس،دیامیر،ہنزہ اور سکردو میں لینڈ سلائیڈنگ کا خدشہ ہے۔پی ڈی ایم اے نے کہا ہے کہ مسافر اور سیاح موسمی حالات کو مدنظر رکھتے ہوئے سفر کریں،سفر کے دوران محتاط رہیں۔تمام اداروں کو الرٹ رہنے کی ہدایات بھی جاری کی جا چکی ہیں۔ڈی جی پی ڈی ایم اے نے کہا ہے کہ تمام ادارے کسی بھی ناگہانی صورتحال سے نمٹنے کے لیے مشینری،ضروری سامان اور ملازمین کو ہمہ وقت تیار رکھیں