بھارت کی پاکستان دشمنی، انسانیت بھول گیا، دوا سازی کے لیے خام مال کی فراہمی روک دی

اسلام آباد: پڑوسی ملک بھارت پاکستان دشمنی میں انسانیت بھی بھول گیا، سرحدوں پر کشیدگی بڑھانے کے بعد اب بھارت نے پاکستان کو دوا سازی کے لیے خام مال کی فراہمی روک دی۔

تفصیلات کے مطابق پاکستان کی جانب سے کشیدگی میں کمی کی مسلسل کوششوں کے باوجود بھارت کے غیر انسانی اقدامات میں کمی نہیں آ رہی ہے۔

بھارت نے پاکستان کو دوا سازی کے لیے خام مال کی فراہمی روک دی ہے، بھارتی تاجروں نے پی پی ایم اے کو فیصلے سے آگاہ کر دیا ہے۔

ذرایع کا کہنا ہے کہ پاکستان فارماسیوٹیکلز مینوفیکچررز ایسوسی ایشن (پی پی ایم اے) نے ادویہ کے خام مال کی فراہمی روکنے پر بھارت سے شدید احتجاج کیا۔

پاکستان فارما مینوفیکچررز ایسوسی ایشن نے صورت حال پر غور کرنے کے لیے اہم مشاورتی اجلاس بلایا جس میں وزیرِ صحت عامر کیانی اور سربراہ ڈریپ نے ویڈیو لنک کے ذریعے شرکت کی۔

ذرایع نے بتایا کہ دوا ساز کمپنیوں کے پاس خام مال کا 15 روز کا ذخیرہ باقی رہ گیا ہے، خام مال کی قلت سے جان بچانے والی ادویات کی تیاری متاثر ہونے کا خدشہ ہے۔