ہم نے مؤثر جواب دے دیا، توقع ہے بھارت ہوش مندی کا مظاہرہ کرے گا: آرمی چیف

اسلام آباد: آرمی چیف جنرل قمر جاوید باجوہ نے کہا ہے کہ توقع ہے بھارت ہوش مندی کا مظاہرہ کر کے وزیرِ اعظم کی دعوت کو مثبت لے گا، تاہم خدشہ ہے کہ بھارت پھر کوئی حرکت کر سکتا ہے۔

اے آر وائی نیوز کے نمائندے عاصم علی رانا کے مطابق پاک فوج کے سربراہ جنرل قمر جاوید باجوہ نے پارلیمانی رہنماؤں کو ان کیمرہ بریفنگ دیتے ہوئے کہا کہ بھارت کوہم نے مؤثر جواب دے دیا ہے۔

ذرایع کا کہنا ہے کہ آرمی چیف نے ان کیمرہ بریفنگ میں کہا ’توقع ہے بھارت ہوش مندی کا مظاہرہ کر کے وزیرِ اعظم کی دعوت کو مثبت لے گا۔‘

آرمی چیف جنرل قمر جاوید باجوہ نے پاک فوج کے شانہ بشانہ کھڑے ہونے پر سیاسی جماعتوں کا شکریہ ادا کیا، ذرایع کا کہنا ہے کہ آرمی چیف نے زیادہ وقت شرکا کو خود بریف کیا۔

آرمی چیف نے کہا کہ ہم پاکستان کے دفاع کے لیے پوری طرح تیار ہیں، کسی پاکستانی طیارے نے ایل او سی کی خلاف ورزی نہیں کی، 2 بھارتی طیاروں کو ایل او سی عبور کرنے پر مار گرایا۔