” نوازشریف کے دورمیں میرا گاڑیوں کا شوروم تھا لیکن پریشان تھا، اب شام کو گرم انڈے بیچ کر مطمئن ہوں“

اسلام آباد (ڈیلی پاکستان آن لائن) سینئر صحافی اور مختلف ادارے حکومتوں کی کارکردگی جانچنے یا اپنے مداحوں کی ذہنیت کا اندازہ لگانے کے لیے سروے کا انعقاد کرواتے رہتے ہیں، اب سینئر صحافی صابر شاکر کے مداحوں کی طرف سے بنائے گئے اکاﺅنٹ سے بھی مسلم لیگ ن اور پی ٹی آئی کے دورحکومت کا موازنہ کرتے ہوئے عوامی رائے جاننے کی کوشش کی گئی لیکن ایک شہری نے جواب میں ایسی بات کہہ دی کہ صارفین کیلئے ہنسی روکنا مشکل ہوجائے گا۔
صارفین سے سوال کرتے ہوئے لکھاگیاکہ ”غیر سیاسی سوال،آپ نوازشریف کے دور میں خوشحال تھے یاعمران خان کے دورمیں خوشحال ہیں،،،جواب ضرور دیں“۔
اس سوال پر مختلف صارفین نے طرح طرح کے کمنٹ دیئے لیکن سردار نصیر خان نے سب کو مات دیدی اور لکھاکہ ”میں اب عمران خان کے دور میں بہت خوشحال ہوں شام کو گرم انڈے بیچتا ہوں اور دن کو کٹے پالتا ہوں۔۔نواز شریف کے دور میں میرا گاڑیوں کا شوروم تھا جس کی وجہ سے ہر وقت ٹینشن کا شکار رہتا تھا۔۔اب الحمدللہ مطمئن ہوں“۔