مفت سہولیات دیکر فیصلہ عوام پر چھوڑا جائے کہ اسکول جانا ہے یا مدارس، سپریم کورٹ

سپریم کورٹ آف پاکستان کے چیف جسٹس آصف سعید کھوسہ نے نجی تعلیمی اداروں میں اضافی فیس سے متعلق کیس میں ریمارکس دیئے کہ ’مفت سہولیات دیکر فیصلہ عوام پر چھوڑا جائے کہ وہ اپنے بچوں کو اسکول بھیجنا چاہتے ہیں یا مدارس‘۔

چیف جسٹس آصف سعید کھوسہ کی سربراہی میں تین رکنی بینچ نے سماعت کی جس میں چیف جسٹس نے کہا کہ کہ سرکاری اسکول نہ ہونے کی وجہ سے بچے مدارس جاتے ہیں اس لیے ضروری ہے کہ حکومت ہر مدرسے کے ساتھ سرکاری اسکول تعمیر کرے۔

انہوں نے کہا ’میں نے خود سرکاری اسکول میں تعلیم حاصل کی لیکن اب سرکاری اسکولوں کا پہلے والا معیار کہاں گیا جس کی وجہ سے بھاری فیس ادا نہ کرنے والا ٹیلنٹ ضائع ہورہا ہے‘۔

عدالت عظمیٰ کے چیف جسٹس نے حکومت پر زور دیا کہ وہ سرکاری اسکول میں مفت کتابیں ، یونیفارم اور دودھ کا گلاس دے اور پھر فیصلہ عوام پر چھوڑا جائے کہ وہ اپنے بچوں کو اسکول بھیجنا چاہتے ہیں یا مدارس۔

آصف سعید کھوسہ نے ریمارکس دیئے کہ پہلے گلی محلوں میں سرکاری تعلیمی ادارے ہوتے تھے اور اب وہ پرائمری اسکول بھی نظر نہیں آتے تاہم اس ضن میں نجی اسکولوں کے ساتھ حکومت سے بھی پوچھیں گے وہ کیا کر رہی ہے۔

نجی اسکولوں میں اضافی فیس سے متعلق کیس میں والدین کی جانب سے وکیل نے کہا کہ سندھ ہائی کورٹ نے نجی تعلیمی اداروں کی ریگولیشن کے قوائد کو کالعدم قرار دے لیکن ایک اور فیصلے میں ریگولیشن کے قوائد کو قانونی قرار دیا۔

جس پر چیف جسٹس آصف سعید کھوسہ نے ریمارکس دیئے کہ قوائد کالعدم قرار دینے کے بعد سندھ ہائی کورٹ کیسے بہال کر سکتی ہے۔

انہوں نے کہا کہ ’آئین کا آرٹیکل 18 کاروبار اور تجارت کی بات کرتا ہے جس سوال جنم لیتا ہے کہ کیا اسکولنگ تجارت ہے یا کاروبار؟‘

چیف جسٹس آصف سعید کھوسہ نے ریمارکس دیئے کہ ’سمجھنا ہے کہ تعلیم تجارت میں آتی ہے کہ کاروبار میں‘۔

اس حوالے سے جسٹس فیصل عرب نے کہا کہ ’ماضی میں سرمایہ کار بورڈ کی پابندیوں سے صنعتوں کی ترقی رکی اور پابندیوں سے ہمیشہ ترقی رکنے کا خدشہ ہوتا ہے‘۔

چیف جسٹس آصف سعید کھوسہ نے ریمارکس دیئے ’کسی نجی اسکول پر قدغن کیسے لگائی جا سکتی ہے؟ یقیناً آکسفورڈ کے ساتھ منسلک اسکول کا معیار دیگر سے بلند ہوگا‘۔

عدالت عظمیٰ کے چیف جسٹس نے کہا کہ ’سہولیات کے عوض فیس وصول کرنا اسکولوں کا حق ہے تاہم شہریوں کی مرضی ہے وہ بچوں کو کس اسکول میں پڑھانا چاہتے ہیں‘۔

اس پر بینچ میں شامل جسٹس اعجاز الاحسن نے کہا کہ ’ریاست کی ناکامی سےپیدا خلا نجی اسکولز پورا کر رہے لیکن نجی اسکولوں کو مادر پدر آزادی بھی نہیں دے سکتے‘۔

بعدازاں نجی اسکولوں میں اضافی فیس سے متعلق کیس کی سماعت سوموار تک ملتوی ہوگئی۔