مقبوضہ کشمیر میں انسانیت سوز مظالم ، بھارت کو لگام ڈالی جائے ، عمران خان کا اقوام متحدہ کے سیکرٹری جنرل سے مطالبہ

وزیراعظم عمران خان نے اقوام متحدہ کے سیکرٹری جنرل سے کہا ہے کہ مقبوضہ کشمیر کی موجودہ صورتحال ناقابل برداشت ہے ، بھارتی فورسز انسانی حقوق کی خلاف ورزیوں میں ملوث ہیں ۔ ایک نجی نیوز چینل کے مطابق وزیراعظم عمران خا ن نے مقبوضہ کشمیر کی صورتحال پر اقوام متحدہ کے سیکرٹری جنرل سے ٹیلی فونک رابطہ کرکے اپنی تشویش سے آگاہ کیا ہے ۔ انہوں نے کہا کہ اقوام متحدہ مقبوضہ کشمیر میں انسانی حقوق کی خلاف ورزیاں بند کرائے اور کشمیریوں کا قتل عام رکوانے میں کردار ادا کرے ۔

ریاستی دہشت گردی سے چند روزمیں 15 کشمیری شہید ، 300 سے زائد زخمی ہوئے ہیں اورمقبوضہ کشمیر کی موجودہ صورتحال ناقابل برداشت ہے ، انہوں نے کہا کہ صدارتی راج کے نفاذ سے مقبوضہ کشمیرمیں حالات مزید بگڑیں گے ، کشمیری نوجوانوں ، بچوں اورخواتین پرتشدد بند کروائے اور جلد اپنا کمیشن بھجوا کرصورتحال کا جائزہ لے ۔ وزیر اعظم نے کہا کہ اقوام متحدہ مقبوضہ کشمیر کی صورتحال کا نوٹس لے اور مسئلہ کشمیر پراپنا خصوصی نمائندہ مقررکرے ۔