یوں ذہن میں جمالِ رسالت سما گیا

یوں ذہن میں جمالِ رسالت سما گیا
میرا جہانِ فکر و نظر جگمگا گیا

خلقِ عظیم و اسوہ ء کامل حضورﷺ کا
آدابِ زیست سارے جہاں کو سکھا گیا

اس کے قدم سے پھوٹ پڑا چشمہ ء بہار
وہ دشتِ زندگی کو گلستاں بنا گیا

انوارِ حق سے جس نے بھرا دامنِ حیات
جو نکہتِ وفا سے زمانے بسا گیا

کتنا بڑا کرم ہے کہ تائب سا بے ہنر
توصیفِ مصطفیﷺ کے لیے چن لیا گیا

yoon zehan mein jamaal e risaalat samaa gya

.