یا رحمت اللعالمینﷺ

یا رحمت اللعالمینﷺ
الہام جامہ ہے تیرا
قرآں عمامہ ہے تیرا
منبر تیرا عرشِ بریں
یا رحمت اللعالمینﷺ

آئینہء رحمت بدن
سانسیں چراغِ علم و فن
قُربِ الہی تیرا گھر
الفَقرُ و فَخرِی تیرا دھن
خوشبو تیری جوئے کرم
آنکھیں تیری بابِ حرم
نور ازل تیری جبیں
یا رحمت اللعالمینﷺ

تیری خموشی بھی اذاں
نیندیں بھی تیری رتجگے
تیری حیاتِ پاک کا
ہر لمحہ پیغمبر لگے
خیرالبشر رتبہ تیرا
آوازِ حق خطبہ تیرا
آفاق تیرے سامعیں
یا رحمت اللعالمینﷺ

قبضہ تیری پرچھائیں کا
بینائی پر ادراک پر
قدموں کی جنبش خاک پر
اور آہٹیں افلاک پر
گردِ سفر تاروں کی ضَو
مرکَب براقِ تیز رو
سائیس جبرئیلِ امیں
یا رحمت اللعالمینﷺ

تو آفتابِ غار بھی
تو پرچم یلغار بھی
عجزووفا بھی پیار بھی
شہ زور بھی سالار بھی
تیری زِرہ فَتحُ و ظفر
صِدق و صفا تیری سِپَر
تَیغُ و تَبَر صبر و یقیں
یا رحمت اللعالمینﷺ

پھر گڈریوں کو لعل دے
جاں پتھروں میں ڈال دے
حاوی ہوں مستقبل پہ ہم
ماضی سا ہم کو ہال دے
دعوی ہے تیری چاہ کا
اس امتِ گمراہ کا
تیرے سوا کوئی نہیں
یا رحمت اللعالمینﷺ

ya Rehmat ul alaamein saww

.