تو ﷺ اوج رسالت ہے شہ خیر امم ہے

تو ﷺ اوج رسالت ہے شہ خیر امم ہے
تو ﷺ وہ ہے کہ زیبا جسے ہو جاہ و حشم ہے

خالق نے بنایا تجھے ہر چیز کا مولا
کونین کی ہر شے تری ممنون کرم ہے

ادراک میں کس طرح سمائے تری عظمت
ہر رفعت افلاک ترا نقش قدم ہے

گونجے ہے زمانے میں ترا اسم گرامی
قائم ہے تو اس نام سے کچھ اپنا بھرم ہے

آنے سے ترے دور ہوئے ظلم کے سائے
تو عدل کا انصاف کا لہراتا علم ہے

خالق نے سکھایا مجھے مدحت کا سلیقہ
محبوب دو عالم کی عطا میرا قلم ہے

زندہ ہے جو اس عہد پر آشوب میں نقویؔ
یہ تیری دعا، تیری نظر، تیرا کرم ہے

Tu saww oj risalat hy shah e khair e umam hy

.