نبی نبی بس پکارتا ہوں زباں پہ جب درود آئے

نبی نبی بس پکارتا ہوں
زباں پہ جب درود آئے
تلاطموں میں وجود آئے
لہو میں کشتی اتارتا ہوں
نبی نبی بس پکارتا ہوں

جب انکی یادوں کا آئے ریلا
لگے ہرے گنبدوں کا میلا
میں اپنے اندر ہجوم بن کر
طواف کرتا رہا اکیلا
حرم سے نکلے حضور عالی
میں ان کے ہمراہ چلنے والی
ہواؤں کا روپ دھارتا ہوں
نبی نبی بس پکارتا ہوں

عجیب ہے عشق مصطفی بھی
بقاکی معراج ہے فنا بھی
کسی کو چاہے کون اتنا
میں ان کا عاشق میرا خدا بھی
برسنے لگتا ہے بس نور ان کا
ہو غائبانہ ظہور ان کا
میں جب اپنی آنکھیں پسارتا ہوں
نبی نبی بس پکارتا ہوں

نگاہ میں جسم کو چھپا کر
میں دیکھوں جب روزنوں سے جا کر
زمین کے نیچے ہیں جلوہ فرما
میرے نبی عرش کبریا پر
میں لامکاں کی بلندیوں کو
خدا کی سب حلقہ بندیوں کو
حرم کے اوپر سے وارتا ہوں

نظر جب ان کا جمال لوٹے
تو ایک پل کو نہ ربط ٹوٹے
کھلیں تسلسل کی وادیوں میں
وہ مستقل رنگ پھول بوٹے
ہری بھری ہو حیات ساری
مہک اٹھے کائنات ساری
افق افق ہاتھ مارتا ہوں
نبی نبی بس پکارتا ہوں

تڑپ کے صدقے ،
وفا کے صدقے
طلب کے صدقے
پڑا ہو مصطفی کے در پر
تصور مصطفی کے صدقے
پروؤں دل درد کی لڑی میں
کسے خبر اک اک گھڑی میں
میں کتنی صدیاں گزارتا ہوں

غم ٖقیامت ہو کیا مظفر
سنے گا نعتیں خدا مظفر
میں کیا کروں کچھ مجھے نہ سوجھے
نبی نبی کے سوا مظفر
فراق ہی جب وصال ٹھہرے
سکوت ہی جب دھمال ٹھہرے
تو دل تو دل جاں بھی ہارتا ہوں
نبی نبی بس پکارتا ہوں

Nabi saww Nabi saww bas pukarta hun zuban py jab darood aye

.