متاعِ سخن ، نقدِ مدحت سلامت

متاعِ سخن ، نقدِ مدحت سلامت​
یہ سرمایہء بیش قیمت سلامت​
​
مدینے کے جلوے مِرے منتظر ہیں​
مِرا جذب و شوقِ زیارت سلامت​
​
مدینے کی گلیوں میں کھو جاؤں یارب​
رہے یہ سماں تا قیامت سلامت​
​
مجھے بھی نشیبِ زمیں سے اٹھالے​
تِرے سبز گنبد کی رفعت سلامت​
​
تصور میں ہے شہرِ سرکارِ والا​
یہ گہوارہء نور و نکہت سلامت​
​
مِرے آئینے کی جِلا اللہ اللہ​
تمنائے مہرِ رسالت سلامت​
​
مدد کو مِری آئیں گے میرے آقا​
مِرا جذبہء استعانت سلامت​
​
ولائے محمدؐ ولائے خدا ہے​
ارادت مبارک عبادت سلامت​
​
ایاز اپنی مدحت وہ خود سن رہے ہیں ​
مبارک مبارک سلامت سلامت​

mtaa e sukhan , naqd e midhat salaamat

.