جو بات ظلم سے نہ ہوئی پیار سے ہوئی

جو بات ظلم سے نہ ہوئی پیار سے ہوئی
تہذیب زندگی تیرے کردار سے ہوئی

جو مہر و ماہ بھی نہ زمانے کو دے سکے
وہ روشنی تیرے در و دیوار سے ہوئی

امکان کی حدوں سے پرے تک تیرے قدم
پیمائش جہاں تیری پرکار سے ہوئی

ساحل کی آرزو نہیں تعلیمِ مصطفٰے
یہ ناو تو روانہ ہی منج دھار سے ہوئی

مظلوم کے لہو کا مقدر بھی جاگ اٹھا
اسکی بھی قدر آپ کی تلوار سے ہوئی

پتھر بھی کھائے میرے رسول کریم نے
معراج حق بھی زینہِ ایثار سے ہوئی

تخلیق کائنات بھی صدقہ حضور ﷺ کا
تزئینِ کائنات بھی سرکار سے ہوئی

عزت ہوئی جہاں میں مظفر کی آپﷺ سے
زر سے ہوئی نہ جبّہ و دستار سے ہوئی

جو بات ظلم سے نہ ہوئی پیار سے ہوئی
تہذیب زندگی تیرے کردار سے ہوئی

jo baat zulm sy na hui pyaar sy hui

.