جس جگہ بے بال و پر جبریل سا شہپر ہوا​

جس جگہ بے بال و پر جبریل سا شہپر ہوا​
سوچتا ہوں میں وہاں مدحت سرا کیونکر ہوا​
​
ساقیِ کوثر کا لطفِ خاص جب مجھ پر ہوا​
بادہء انوار سے پُر ذہن کا ساغر ہوا​
​
آپ جب جلوہ فروزِ مسندِ امکاں ہوئے ​
ذرہ ذرہ آئینہ دارِ شہِ خاور ہوا​
​
ہے مسلسل نکہت و انوار کی بارش وہاں ​
جس نگر ، جس انجمن میں ذکرِ پیغمبر ہوا​
​
جب کبھی برداشت سے باہر ہوئی فرقت کی دھوپ​
سایہ افگن دامنِ رحمت وہیں مجھ پر ہوا ​
​
ان کے در سے مل گیا پروانہء بخشش مجھے​
مجھ سے عاصی پر بھی لطفِ شافعِ محشر ہوا​
​
وجہِ تکوینِ جہاں کی نعت لکھی جب ایاز​
آئینہ ایک ایک حرفِ کُن فکاں مجھ پر ہوا ​
​

jis jagah hai bal o par Gabril sa shehpar hua

.