جب تک بہ ذکرِ خیرِ شہِ مرسلیں رہے

جب تک بہ ذکرِ خیرِ شہِ مرسلیں رہے
میری زباں پہ چاشنی انگبیں رہے

در سایۂ ملائکۂ مُکرَمیں رہے
محفل وہ جس میں تذکرۂ شاہِ دیں رہے

میری دعاؤں میں یہ دعا اوّلیں رہے
کلمہ زباں پہ اس کا دمِ واپسیں رہے

معراجِ مصطفیٰ کا خیالِ حسیں رہے
کچھ ساعتوں کو دل یہ بہ عرشِ بریں رہے

پیشِ نگاہ جس کے بھی عرشِ متیں رہے
وا اس کے واسطے درِ خلدِ بریں رہے

یاروں میں چار یار جو بے حد قریں رہے
بعدِ نبیؐ، نبیؐ کے خوشا جانشیں رہے

جائے قرارِ شیفتگاں کیوں نہ ہو حرا
اس میں حبیبِ رب کبھی عزلت گزیں رہے

تسبیح و ذکرِ ربِ دو عالم ہے بے ثمر
حبِ نبیؐ نہ دل میں اگر تہ نشیں رہے

پہنے کفن وہاں تو ملے جنت البقیع
ہو گا نہ دل یہ کس کا کہ مر کر وہیں رہے

خوش خلقیِ نبیِؐ مکرم صد آفریں
چیں بر جبیں ہوئے نہ کبھی خشمگیں رہے

بچپن سے لے کے تا نفسِ آخریں نظرؔ
وہ صادق الحدیث رہے وہ امیں رہے

jab tak he zikr e khair sheh mursaleen

.