ہم شاعروں پہ کس قدر احسانِ نعت ہے

ہم شاعروں پہ کس قدر احسانِ نعت ہے
طبـع آزما جـو آج پھـر ایوانِ نعت ہے

ارفع سخن طراز بھی پہنچے نہ میمﷺ تک
اللہ کا کلام ہـی شایانِ نعت ہے

پائے گا اِس سے دل مرا دوہری حلاوتیں
اک سلسلہ درود کا دورانِ نعت ہے

حدِ نگہ ہیں گلستاں اور گلستاں میں پھول
کتنا وسیع خیر سے میدانِ نعت ہے

مظہر ہیں تیرےﷺ نور کا عالم کی رونقیں
شمس و قمر کی روشنی عرفانِ نعت ہے

اُنﷺ کے کرم کا دائرہ محدود تو نہیں
"ہر شعبہء حیات میں امکانِ نعت ہے”

محشر میں جب سوال ہو، کچھ ہے تمہارے پاس؟
تب میں کہوں کہ ہاں مرا دیوانِ نعت ہے

لمحہ بہ لمحہ ذکرِ شہہء انبیاﷺ چلے
آذرؔ ہمـارا حـلقہ دبستانِ نعت ہے

ham shaairon py kis qadar ehsan e neamat hy

.