ہے رشک شہنشاہی وہ شان فقیرانہ

ہے رشک شہنشاہی وہ شان فقیرانہ
قربان ہوئی جس پر ہر شوکت شاہانہ

بھرتے ہیں سلاطیں بھی دم ان ﷺ کی غلامی کا
اللہ و غنی ان کا الطاف کریمانہ

اس در پہ ملائک بھی کرتے ہیں جبیں سائی
ہے جلوہ گہ جاناں سرکار ﷺ کا کاشانہ

سرکار ﷺ کے سجدوں کی عظمت تو کوئی دیکھے
اب قبلہ عالم ہے وہ گھر جو تھا بت خانہ

سوز غم پنہاں کی لذت تو وہی سمجھے
جو عشق محمد ﷺ میں دنیا سے ہو بیگانہ

دشمن کو بھی سینے سے لپٹاتے ہیں وہ اپنے
اے صل علیٰ ان ﷺ کا اخلاق محبانہ

تصدیق حقیقت ہو یوں میری محبت کی
سرکار ﷺ دو عالم کا بن جاؤں میں دیوانہ

کچھ اشک ندامت ہیں آنکھوں میں فقط باقی
کیا پیش کروں ان ﷺ کی سرکار میں نذرانہ

اس خاک نشیں کو بھی قدموں میں بلا لیجے
ستارؔ حزیں کی ہے یہ عرض غلامانہ

hai rashak shehnshahi wo shaan faqeerana

.