گردش میں ہےفلک نہ زمیں پیچ و تاب میں

گردش میں ہےفلک نہ زمیں پیچ و تاب میں ​
کتنا سکوں ہے شہرِ رسالت مآب میں ​
​
طے کر رہا ہوں راہِ مدینہ بہ رخشِ خواب ​
"نے ہاتھ باگ پر ہے نہ پا ہے رکاب میں "​
​
عشقِ محمدیؐ نے مِری رہنمائی کی ​
کب سے بھٹک رہا تھا جہانِ خراب میں ​
​
ضوبار ہیں نقوشِ کفِ پائے مصطفؐےٰ ​
تاروں میں ، کہکشاں میں ، مہ و آفتاب میں ​
​
ذکرِ نبیؐ نہ ہو تو کہیں روشنی نہ ہو​
بزمِ خیال میں نہ شبستانِ خواب میں ​
​
ہے سرنگوں جلالِ عمر آپ کے حضور​
خورشید ڈھل رہا ہے رخِ ماہتاب میں ​
​
کیا لکھئے مدحِ صاحبِ لوح و قلم ایاز ​
مدحت کی انتہا ہے خدا کی کتاب میں ​

gardish mein falak na zameen pech o taab main

.