فزوں تر عشقِ احمد مصطفیٰؐ ہو

فزوں تر عشقِ احمد مصطفیٰؐ ہو

کرم فرما زمانوں پر خدا ہو



محبت ہو جو محبوبِ خداؐ سے

خدا کی بندگی کا حق ادا ہو



خدا کر دے عطا اٹھنے سے پہلے

مری سرکارؐ کا دستِ دعا ہو



مروّت، حلم ہو انساں کا شیوہ

زباں پر لا الہ، صلِ علیٰ ہو



حضورؐ اُمت مصائب میں گھری ہے

نگہِ لطف و کرم، بہرِ خدا ہو



فضیلت آپؐ کو دی ہے خدا نے

شفاعت آپؐ کی روزِ جزا ہو



ظفرؔ کے سر پہ رحمت کی ردا ہو

عطائے جاں فزا ہو، دل کشا ہو

fazoon tar ishq e Ahmad Mustafa saww ho

.