دل لگڑا بے پرواہاں نال​

دل لگڑا بے پرواہاں نال​
جتھے دم مارن دی نہیں مجال​
صلی علیہ ذوالجلال​

روندیاں نیناں نوں سمجھا رہی​
لکھیا پڑھیا سب بھلا رہی​
ہک نام سجن دا گا رہی​
رگ رگ لوں لوں ساہاں نال​
دل لگڑا بے پرواہاں نال​
جس دی سک مینوں اوہ تاں آیا نہیں​
ہک جھٹ گھڑی سکھ پایا نہیں​
پل پل گھڑی دسے سو سو سال​
صلی علیہ ذوالجلال​
دل لگڑا بے پرواہاں نال​
سوہنا میں توں کیوں چت چاگیا​
لگیاں پریتاں بھلا گیا​
قسمت سڑی دا واہ پیا​
تتی ریت عرب دیاں رہاں نال​
دل لگڑا بے پرواہاں نال​
جیندی جند تلی تے دھر رہی​
گل پلڑا منتاں کر رہی​
لکھ واری توبہ پڑھ رہی​
رٹھڑا مناون دا خیال​
دل لگڑا بے پرواہاں نال​
کراں یاد میں سوہنی جھات نوں​
اس سفر عرب والی رات نوں​
اس حمرا وادی دی گھات نوں​
یالیتنی یوم الوصال​
دل لگڑا بے پرواہاں نال​
سارا دن گزراں بھوندیاں​
گھت پلڑا مکھ تے روندیاں​
ہنجواں نال مکھڑا دھوندیاں​
ساری رین سولاں تے آہاں نال​
دل لگڑا بے پرواہاں نال​
کیتی بھج کے وانگ کباب ہوئے​
پیتے باہجھ شراب خراب ہوئے​
سرشار اتے بے تاب ہوئے​
انہاں خونیاں مست نگاہاں نال​
دل لگڑا بے پرواہاں نال​
کیتی وچ غمان غلطان ہوئے​
اندر یاد سجن مستان ہوئے​
حیان بہوں پریشان ہوئے​
انہاں پیچیاں زلف سیاہاں نال​
دل لگڑا بے پرواہاں نال​
آدم تھیں تا عیسی مسیح​
نفسی بلیسن سب نبی​
اتھے بولسی ہک امتی​
احمد نبی صاحب کمال​
دل لگڑا بے پرواہاں نال​
ربی الھی صمدی​
صل وسلم علی النبی​
فاطمۃ الزھرا و علی​
حسنین جگ دی پناہاں نال​
دل لگڑا بے پرواہاں نال​
مہر علی توں کون بچارا​
نپٹ لا شے تے اوگن ہارا​
سر تے چا کے عیباں دا بھارا​
لاویں پریت توں شاہاں نال​
دل لگڑا بے پرواہاں نال​
لا کے پریتاں کدی نہ نسیئے​
بھیت دلاں دا مول نہ دسیئے​
اندر رویئے تے باہر ہسیئے​
ملیے سداں پے چاہاں نال​
دل لگڑا بے پرواہاں نال​
مہر علی کیوں پھریں اداسی​
اج کل سوہنا آ گل لاسی​
ہوسن خوشیاں تے غم جاسی​
ملساں لمیاں کر کر باہاں نال​
دل لگڑا بے پرواہاں نال​

dill lagra be parwahan naal

.