درِ سرکارؐ پر گریاں ہے کوئی آبدیدہ ہے

درِ سرکارؐ پر گریاں ہے کوئی آبدیدہ ہے

ہے کوئی نیم بسمل، نیم جاں ہے، دل تپیدہ ہے



یہاں دم مارنے کی ہے بھلا تاب و تواں کس میں

ادب سے ہر کوئی یاں دم بخود ہے، دم کشیدہ ہے



کھڑے یاں تاجدار و مُقتدر بھی دست بستہ سب

درِ سرکارؐ پر دیکھو جسے بھی، سر خمیدہ ہے



جہاں جس حال میں ہوں آپؐ کے قدموں میں ہوتے ہیں

طریقِ عاشقاں یہ، میرا دیدہ و شنیدہ ہے



فقط اللہ اِلہ، میرے رسول اللہ محمدؐ ہیں

یہی ایمان کامل ہے، یہی محکم عقیدہ ہے



خُدایا اس طرح مقبول نعتیں ہوں مری جیسے

پسند آیا مری سرکارؐ کو بُردہ قصیدہ ہے



مری سرکارؐ مجھ کو اپنے دامن میں چھُپا لیجے

کرم فرمایے آقا!، ظفرؔ دامن دریدہ ہے

dare Sarkaar saww per giryan hai koi aabdeedah hai

.