اللہ اللہ کیا سفر کیا روح پرور خواب تھا

اللہ اللہ کیا سفر کیا روح پرور خواب تھا
فرشِ ریگِ راہِ طیبہ بسترِ سنجاب تھا
نطقِ جاں شیرینیء مدحت سے لذت یاب تھا
یہ کتابِ زندگی کا اک درخشاں باب تھا
ارضِ طیبہ پر قدم تو کیا ، نظر جمتی نہ تھی
"ذرہ ذرہ روکشِ خورشیدِ عالم تاب تھا "
بن گیا اشکِ ندامت میری بخشش کا سبب
بربطِ امید کب سے تشنہء مضراب تھا
صبح کا تارا حضوری کا پیامی بن گیا
رات ہجرِ مصطفؐےٰ میں دل بہت بیتاب تھا
آنکھ بیتابِ نظارا تھی نہ دل تھا مضطرب
اُن کے در پر ہر کوئی شائستہء آداب تھا
اللہ اللہ روبرو ہے گنبدِ خضرا ایاز
بن گیا عینِ حقیقت جو نظر کا خواب تھا

Allah Allah kya safar kya rooh parwar khwab tha

.