آپؐ کے نام سے موسوم ہے دیواں میرا​

آپؐ کے نام سے موسوم ہے دیواں میرا​
اللہ اللہ یہ شرف خواجہء گیہاں میرا ​
​
رنگ و بُو ، لالہ و گل ، سرو و سمن جشنِ بہار​
آپؐ میرے ہیں تو سارا ہے گلستاں میرا​
​
آپؐ کا عشق ازل سے ہے مِرے دل میں مقیم​
سب پہ ظاہر ہے یہ سرمایہء پنہاں میرا​
​
آپؐ کی مدح لکھے جاؤں یونہی تا بہ ابد​
ساتھ چھوڑے نہ کبھی عمرِ گریزاں میرا​
​
ہے محیطِ دل و جاں گنبدِ خضرا کا خیال​
کیا بگاڑے گا بھلا وقت کا طوفاں میرا​
​
آخرت کے لئے سامان بہم ہو ہی گیا​
بن گئے اشکِ ندامت سرو ساماں میرا​
​
ہے مطافِ دل و جاں اسمِ گرامی اُن کا​
یہی قبلہ ، یہی کعبہ ، یہی ایماں میرا​
​
اِس سے پہلے کہ کوئی پُرسشِ وحشت ہوتی​
چھپ گیا دامنِ رحمت میں گریباں میرا​
​
اللہ اللہ ایاز اُن کی عطا کا عالم​
بھر دیا دولتِ کونین سے داماں میرا​

Aap saww ky naam sy mosooom hai dewaan mera

.