آپؐ کا فیض عام ہوتا ہے

آپؐ کا فیض عام ہوتا ہے

عشق پھر ہم کلام ہوتا ہے



آپؐ پھر سے ہیں مائلِ اکرام

پھر سے گردش میں جام ہوتا ہے



پھر سے جاری ہر ایک محفل میں

ذِکرِ خیر الانامؐ ہوتا ہے



ذِکرِ خیر البشرؐ دِل و جاں میں

صبح ہوتا ہے شام ہوتا ہے



بے کسوں اور بے سہاروں پہ

لُطف اُنؐ کا مدام ہوتا ہے



اس کو دیکھا ہے سرفراز سدا

وہ جو اُنؐ کا غلام ہوتا ہے



حمد بھی، نعت بھی ظفرؔ پیہم

اور درُود و سلام ہوتا ہے

Aap saww ka faiz aam hota hai

.