آپؐ ہیں خیر البشرؐ خیر الوریٰؐ، میرے نبیؐ

آپؐ ہیں خیر البشرؐ خیر الوریٰؐ، میرے نبیؐ

آپؐ ہیں شمس الضحیٰؐ بدر الدجیٰؐ، میرے نبیؐ



انبیا ہیں لائقِ تعظیم سارے ہی مگر

منفرد، یکتا، امام الانبیاؐ، میرے نبیؐ



دِلرُبا و دِلکشا و جاں فزا و رُوح فزا

مسجدِ نبوی کی نورانی فضا، میرے نبیؐ



اس لیے یاں پر معطر ہے معنبر ہے ہوا

چھُو کے آتی ہے یہ دامن آپؐ کا، میرے نبیؐ



میں بھی ہوں اُمیدوارِ یک نگاہِ التفات

آپؐ کے در کا ہوں میں ادنیٰ گدا، میرے نبیؐ



آپؐ کے دیدار سے عُشاق ہوں گے فیض یاب

جلوہ فرما ہوں گے جب روزِ جزا، میرے نبیؐ



آپؐ کے فیضان سے زندہ و تابندہ، ظفرؔ

دم بدم، ہر دم پکارے ہے سدا، میرے نبیؐ

Aap saww hain albashar saww khair ul waraa saww , mery Nabi saww

.