آنکھیں لہو لہو تھیں ، نہ دل درد درد تھا​

آنکھیں لہو لہو تھیں ، نہ دل درد درد تھا​
ہجرِ نبیؐ میں ضبط کا انداز فرد تھا​
​
صحرا نشیں و عرشِ معلّےٰ نورد تھا​
اللہ ! ایک فرد دوعالم میں فرد تھا​
​
اَسرا کی رات مہرِ رسالت کو دیکھ کر​
رنگِ نجوم و چہرہء مہتاب زرد تھا​
​
پل بھر میں بامِ عرش پہ تھا شہسوارِ نور​
دامانِ کہکشاں تھا کہ رستے کی گرد تھا​
​
خلدِ نظر تھا گلشنِ سرکار خواب میں​
پژ مردہ کوئی گُل نہ کوئی برگ زرد تھا​
​
گریہ سبب ہوا مرے عفوِ گناہ کا​
آنکھیں جلیں تو شعلہء تقصیر سرد تھا​
​
مدحت کے باب میں یہ عجب لطف تھا ایاز​
میں خواب میں ، خیالِ مدینہ نورد تھا​
​

aankhyn lahoo lahoo thin, na dill dard dard tha

.