دنیا بھر کے مسلم ممالک کی تنظیم کا پاکستان پر اعتماد،شاندار فیصلہ کر لیا

و آئی سی کا بین المذاہب ہم آہنگی، دہشت گردی کے خلاف جنگ اور اعتدال پسند ترقی کے لئے انٹرنیشنل اسلامک یونیورسٹی اسلام آباد میں بین الاقوامی سینٹر قائم کرنے کا فیصلہ
جمعرات 27 دسمبر 2018 19:18

او آئی سی کا بین المذاہب ہم آہنگی، دہشت گردی کے خلاف جنگ اور اعتدال ..

اسلام آباد ۔ اسلامی تعاون تنظیم (او آئی سی) نے بین المذاہب ہم آہنگی، دہشت گردی کے خلاف جنگ اور اعتدال پسند ترقی کے لئے پاکستان میں انٹرنیشنل اسلامک یونیورسٹی اسلام آباد میں بین الاقوامی سینٹر قائم کرنے کا فیصلہ کیا ہے۔

جمعرات کو یہاں موصولہ پیغام کے مطابق مراکش کے دارالحکومت رباط میں او آئی سی اور اسلامک انٹرنیشنل یونیورسٹی کے مابین ایک معاہدہ طے پایا ہے۔

او آئی سی کے اسلامی تعلیم، سائنسی و ثقافتی تنظیم کے سربراہ ڈاکٹر عبدالعزیز اوتمان اور اسلامک یونیورسٹی کے صدر پروفیسر ڈاکٹر احمد یوسف الدرویش نے معاہدے پر دستخط کئے۔ معاہدے کے مطابق بین الاقوامی سنٹر کے تمام اخراجات تنظیم ادا کرے گی۔ دورے کے دوران اسلامی یونیورسٹی کے صدر نے پیغام پاکستان کے بارے میں قومی بیانیہ سے اسلامی سکالرز کو آگاہ کیا جس کو سراہا گیا۔